مفضلاتي من العطور والروائح الشرقية
By مولاش - 12:56 ص
بسم الله الرحمن الرحيم
عُدنا والعود احمد
تدوينة اليوم بشاركم فيها بالعطور والروايح الشرقية اللي افضلها واستخدمتها الفترة الاخيرة .. جربت اشياء كثير واللي بتكلم عنها الان هي جزء كبير منهم
لكل اللي يحبون الروائح الشرقية راح تستمتعون بهالتدوينة !
هذي صورة للعائلة الكريمة :
نبدا بأول عطر :
عطر چيفنشي " ما عرفت اقرا اسمه ! "
خلونا نتكلم بالالوان ، لونه زي ما انتو شايفين بني
فيه مجموعة وهذا الوحيد من بينهم اللي ريحته شرقية فخمة جداً
وثباته طبعاً قوي جداً وعطر مميز فوّاح ..
سعره ؛ ٧٠٠ ريال
من سيفورا
الغني عن التعريف
مونتال (مسك روز )
هذا العطر يعجب الكل سواء يحبون الروايح الشرقية او لا لانه يتميز بانه من الروايح الشرقية الخفيفه اللطيفه
ينفع للصباح وللمسا
ثباته جدا قوي
سعره : بحدود370
من سيفورا ومتوفر بجميع محلات العطور
هذا العطر من مجموعة جديدة عند الماجد للعود
ريحة مسك مركزة
استخدمه بعد الشاور حلوه ريحته لما تفوح من الجسم تحسسك بالنظافه
ولكن قليل استخدامي له على الملابس لان الريحة مو من مفضلاتي
احبها بس على جسمي بعد الشاور
اماكن البيع : الماجد للعود
سعره بحدود 200 ريال
عطر عود تتش من غناتي
كولكشن جديد عند غناتي
على اسمه ( عود ) عطر مخلط يغلب على ريحته العود بس
بنسبة خفيفة
من العطور الفخمة ومميزة
ولكن الثبات مو قوي كثير وهذا عيب عطور غناتي
من غناتي
سعره 200 ريال
ربع تولة عود من عبدالصمد القرشي وللاسف اني نسيت اسمه !
اذا خلض بوديه لهم يعلموني ايش هو 😅
ريحته خيالية
اتعب وانا اقول خيالية
اللي يحبون العود بيعجبهم مره
انا كل جمعة استخدمه واحيانا اكسر القاعدة واحط منه بأي وقت لاني احبه كثيير
من القرشي روحولهم وقولوا للموظف يعطيكم عود ريحته خفيف لطيفه 😂
ان شاءالله اذا عرفت اسمه راح احدث التدوينة واضيفه
سعر الربع توله كان بحدود ال 170ريال
وختامها مسك مع مسك الختام من عبدالصمد القرشي
الريحة خيالية , مسك معطر شوية
يعني مو مركزه ريحة المسك كثير بس جميييله جدا
والثبات قوي جدا
وبما انني ختمت بعبدالصمد موقعهم فيه خصومات 50 بالمية
شموا العوده والمسك عندهم واطلبوها من الموقع
من عبدالصمد القرشي
سعر النص توله بحدود 200 ريال
ان شاءالله عجبتكم التدوينة وان شاءالله ارجع للتدوين مجددا
اتمنالكم ايام سعيدة
- اذا حبيتي التدوينة شاركي رابطها مع صحباتك
واكتبولي تحت ايش افضل العطور الشرقية عندكم
0 التعليقات