بسم الله الرحمن الرحيم
..
واخيرا قررت اني انزل تدوينة جديده في قسم الكتب ولمحبين هذا النوع من التدوينات , كتاب اليوم قريب جدا من القلب ,,
بداية هو مذكرات فرح بهلوي وهي امبراطورة ايران سابقا , شفت مجموعة كتب اشتراها اخوي ولقيت من ضمنها كتابها اول ما جذبني للكتاب هو هذي الشخصية العظيمة , وعلى طول نزلت اشتريت الكتاب عشان اقراه , عرفت انها شخصية عظيمة وعرفت ان الكتاب بيكون ممتع وجميل جدا من الكتابه الموجوده خلف الكتاب والموجز البسيط اللي ذكرته واختصرت فيه كل شي ,
اللي شدني ايضا للكتاب هو تاريخ هذي الدوله المجهوله بالنسبه لنا كلنا , مين الشاه ؟ مين فرح ديبا ؟ حسيت اني ودي اطلع على هذا التاريخ , بالمناسبة انا ابدا ما احب كتب التاريخ او الافلام او المسلسلات التاريخيه ! ولكن للكاتب سلطته على القارئ !
,,
مسكت الكتاب وبدأت في صفحاته الاولى وبعدها حبيته وصرت اشتاق للجلوس في غرفتي وقراءة بقية الاحداث ,
مجرد ما افتح الكتاب احس اني دخلت ايران ودخلت القصر وقاعده قدام فرح واسمعها تحكيني , اسلوب سلس اسلوب مليئ بالتشويق اسلوب يخليك تروح بخيالك بعييييد مجرد ما اقفل الكتاب يجيني شعور السقوط ع الارض والاستيعاب " انتي بالسعوديه امل انتي بسنة 2016 !! " ولهذا السبب قلتلكم للكتاب سلطته على القارئ ,,
,,
مجرد انهيت الكتاب حسيت اني صار عندي مرجع وخلفية عن ماهية ايران سابقا ! صار عندي فكرة عن كل دول العالم وموقفها تجاه اي نكبة ممكن ان تحدث لأي دولة , انا اعرف ان المواقف بانت لنا الان ان العرب ضعيفين ولكن من قراءتي للكتاب عرفت ان العرب اقوى من الغرب بكثير واصحاب كلمة ووقفة قويه مع بعضهم , كما عهدناهم
,,
دخلت حياتهم صرت اعرفهم واعرف تفاصيل يومهم اعرف تفاصيل حياتهم , خروج فرح للجولات والمرور على الشعب الايراني والسؤال عن حالهم وتقديم المعونة لهم حسيت اني معاها اعيش اللحظات وضحكات النساء والاطفال لها وسلامهم عليها ,
,,
ممكن بعضكم بيقول لي حكم الشاه ما كان جيد ! وفيه وفيه وفيه , توقفوا ارجوكم ,,
انا ليس لي علاقه بحكم الشاه محمد رضا ولا اؤيده ولا ارفضه , انا قرأت الكتاب الممتع وتعرفت على تاريخ ايران وعلى محمد رضا وعلى عائلته ,
,,
اذم بالكتاب التعمق بالتفاصيل جدا جدا جدا ممكن هذا هو السبب اللي خلاني اعيش وكأني معهم ! ولكن حسيت للحظات بالملل وان هذا الكلام ما يهمني ابغى الاحداث والي يصير بعد كذا !
والصدمة كانت انه بعد كل الفصول والابواب اخر فصل بالكتاب كان فيه كل الاحداث اللي صارت المهمه , من موت وموت وموت لثلاثة شخصيات من العائله ! قصص عورت قلبي !
قفلت الكتاب وحسيت بالفرح وبالحزن ,
بالفرح لاني خلصت كتاب عدد صفحاته 400 وانا مو ذيك العلاقه مع الكتب وكمان كان تاريخ !
وبالحزن لاني ودعت فرح بهلوي , هذي الشخصية اللي اعجبت فيها ودخلت قلبي !
واصدمكم ؟ تحلمت فيها انها تساعدني في مشكله هههه ,,
عموما تفاصيل الكتاب بذكرها لكم الان :
اسم الكتاب : مذكرات فرح بهلوي
عدد الصفحات 400 صفحه
مكان الشراء : مكتبة جرير
سعر الكتاب : ما يقارب ال80 ريال
..
تقيمي له 9/10
اشوفكم بتدوينات جديده :***
تابعوني على مواقع التواصل الاجتماعي
snap : mulsh1
insta : aml.fs
twett : muulash
..
5 التعليقات
كتابة رائعة وأسلوب أروع بكل صراحة لو كنت من محبي هذا النوع من الكتب لما ترددت لحظة واحدة بإقتنائه وقرائته.وشكرا...
ردحذفمررره حبيت التديونة و شكلي كدا حشتري الكتاب
ردحذفمولاش جتني فترة اقرأ و اشوف افلام وثائقية عن إيران قبل الثورة الخمينية
ردحذفو هذا الكتاب سمعت عن كثير و كان دايما في قائمة الكتب الي بقرأها
الحين حمستيني :)
مراجعتك للكتاب كافية ووافية وممتعة *.*
يعطيك العافية مولاش :**
مرحبااا مولاش
ردحذفحبيت التدوينه فوق الحب
حسيت وانا اقرأ أنك تتكلمي عني عن نفس احساسي بكتاب سيرة ذاتيه عن امرأه لم اعرفها يوماً
لكن حبيتها سيرتها و نضالها و شخصيتها وكثير حولها و عن الهند موطنها
نفس الشيء انا في يوم من الايام زماان من ايام المدرسه كنت اكره التاريخ ، ماكنت عارفه قيمته مثل ما اعرفها الأن .
و من اسباب كرهي اني انسانه يصعب علي الحفظ ، لو شي مافهمته ما استوعبته استيعاب كامل مستحيل احفظه
و كانت مادة التاريخ ماده صعبه عليا لأن المعلمه وقتها تطالبا بحفظ تفاصيل التفاصيل وانا كنت اتعقد من هالشيء
المهم مع الزمن واكتشافي لشغفي بالقراءة كانت ملاذي من كل شيء اشعر بين الكتب بإني في عالم جميل .. جميل جداً
إن شاء الله اكتب عن هالكتاب الي ذكرته لك عن الهند و اتوقع بيعجبك
سعيده بمروري هنا و سعيده اكثر بمعرفتي فيك .
تدوينتك ملهمه ومحفزه للقراءه .
شكراً لك أمل
في حفظ الرحمن .
جولزا
حبيت المراجعة جداً ، اعطيتينا الزبدة ، مع إني زيك مو من المهووسين بالكتب لكن حمستيني أقرأه
ردحذفشكراً .